КУМИТАИ ДАВЛАТИИ САРМОЯГУЗОРӢ ВА ИДОРАИ
АМВОЛИ ДАВЛАТИИ ҶУМҲУРИИ ТОҶИКИСТОН
АМВОЛИ ДАВЛАТИИ ҶУМҲУРИИ ТОҶИКИСТОН
Дӯстони гиромӣ,
Меҳмонони сайт
Мехостам сароғоз нисбати таваҷҷуҳи Шумо ба сомонаи мо ва хоҳиши ҳамкориатон бо Тоҷикистон арзи сипос баён намоям.
Ҷумҳурии Тоҷикистон аз замони ба даст овардани истиқлолият дар роҳи татбиқи сиёсати ислоҳоти фаъол ҷиҳати таъмини рушди босуботи иқтисодиёт тавассути ҳамгироӣ ба хоҷагидории иқтисодии ҷаҳонӣ чораҳои зарурӣ ва таъсирбахш меандешад.
Фазои сиёсӣ ва сармоягузории мамлакат, инчунин санадҳои меърии ҳуқуқии қабулгардида ҷиҳати ҳалли бисёр вазифаҳои афзалиятнок оид ба рушд ва таҷдиди иқтисодиёт, ҷалби ҳарчи бештари сармоягузорӣ ба иқтисодиёти мамлакат ва рушди бахши хусусӣ мусоидат менамоянд.
Иқтисодиёти рӯ ба тараққиниҳодаи Тоҷикистон бо бисёр паҳлӯҳо бо иқтисодиёти ҷаҳонӣ пайваста буда, дар баробари давлатҳои дигари дунё муттаасири оқибатҳои бӯҳрони молиявӣ-иқтисодӣ гардидааст.
Аз ҷониби Ҳукумати Ҷумҳурии Тоҷикистон дар самтҳои дастгирии соҳаҳои бонкӣ ва истеҳсолӣ, суръатбахшӣ ба ҷараёни ислоҳоти сиёсати танзимкунонӣ, ки барои соддагардонӣ ва камхарҷгардонии тартиби амалӣ намудани фаъолияти соҳибкорӣ равона шудааст, кӯшишҳои зиёде ба харҷ дода мешавад.
Ҷумҳурии Тоҷикистон ҳамчун аъзои комилҳуқуқи ҷомеаи башарӣ, дар самти татбиқи ислоҳоти иқтисодӣ ва ҳамгироии бештар ба иқтисодиёти ҷаҳонӣ талош меварзад. Натиҷаи ин талошҳо буд, ки таи солҳои охир ислоҳотҳои иқтисодӣ амалӣ гардида, дастовардҳо ба монанди беҳтаргардонии фазои соҳибкорӣ ва сармоягузориро ба бор омаданд. Ҳамзамон, ҷараёни ислоҳоти институтсионалӣ бо маром идома дошта, инфрасохтори воқеии иқтисодиёти бозоргонӣ ташаккул меёбад. Инчунин, дар ин раванд татбиқи ислоҳоти мақомотҳои идоракунии давлатӣ мавриди амал қарор гирифтааст.
Шинохта шудани Ҷумҳурии Тоҷикистон, ҳамчун яке аз даҳ кишвари ислоҳотгар дар ҳисоботи солонаи Бонки Умумиҷаҳонӣ «Пешбурди Тиҷорат» (Doing Business) нишонаи муҳимми он аст, ки мамлакати мо ба ҳамаи мушкилотҳо ва таъсири бӯҳрони молиявӣ-иқтисодӣ нигоҳ накарда дар роҳи пешгирифтаи худ баҳри рушди босубот тавассути гузаронидани ислоҳотҳо, ташкили инфрасохтори боэътимод ва пурзӯр намудани амнияти энергетикии худ пойдор аст.
Бояд қайд намуд, ки ин ҳама пешрафтҳо бо дарназардошти дастгирӣ ва иродаи сиёсии Президенти Ҷумҳурии Тоҷикистон, мӯҳтарам Эмомалӣ Раҳмон, фаъолияти густурдаи сохторҳои Ҳукумати Ҷумҳурӣ ва иштироки фаъоли ташкилотҳои байналмиллалӣ ва бахши хусусӣ ба даст омадааст.
Шумо метавонед ҳамаи маълумоти лозимаро оид ба қонунгузории мавҷудаи Тоҷикистон дар самти сармоягузорӣ, дастгирии соҳибкорӣ, идоракунӣ ва хусусигардонии амволи давлатӣ, инчунин имтиёзҳо ва сабукиҳо барои сармоягузорон ва соҳибкорон, тартиби иштирок дар ҷараёни хусусигардонии амволи давлатӣ ва дигар маводҳои зарурӣ вобаста ба фаъолияти тиҷоратӣ аз сомонаи мазкур дастрас намоед.
Мо мутмаинем, ки он маводу маълумотҳое, ки Шумо аз сомонаи мо ба даст меоред барои онҳое, ки ҷиҳати ташкил ва рушд додани фаъолияти соҳибкории худ дар Ҷумҳурии Тоҷикистон ҳавасманданд, аз манфиат холӣ нест.
Аз фурсат истифода бурда, ман Шуморо ба сармоягузории фаъол ва азхудкунии бозорҳои нав даъват намуда, бо изҳори боварӣ баён менамоям, ки Шумо дар симои Ҷумҳурии Тоҷикистон шарики боэътимоди дарозмӯҳлатро дарёфт хоҳед намуд.
Давлаталӣ Саидов
Раиси Кумитаи давлатии сармоягузорӣ
ва идораи амволи давлатии
Ҷумҳурии Тоҷикистон
